Ақтауда "МАЭК" ЖШС су тарту каналын тереңдету жұмыстары жүргізілуде, деп хабарлады қала әкімдігінің баспасөз қызметі.
Ақтау қалалық құрылыс бөлімінің басшысы Еркінбек Ауқан бұл жұмыстар қаланы ауыз сумен тұрақты қамтамасыз етуге бағытталғанын атап өтті.
"Қаланы ауыз сумен және электр энергиясымен тұрақты қамтамасыз ету үшін Ақтау әкімдігі мен мердігер ұйым арасында шарт жасалды. Қазіргі уақытта "МАЭК"ЖШС су алу каналын түбін тереңдету жұмыстарын жүргізуде. Келісімшартқа сәйкес құрылыс жұмыстарын аяқтау 2025 жылдың қаңтарына жоспарланған. Орындалатын жұмыстардың жалпы ұзындығы шамамен 560 метрді, ал ені орта есеппен 20 метрді құрайды", — деді Ақтау қалалық құрылыс бөлімінің басшысы Еркінбек Жауқан.
Мердігер компанияның техникалық директоры Алексей Гатин бұл канал арқылы "МАЭК"ЖШС жылу электр орталығына(ЖЭО-2) су берілетінін атап өтті.
"Бұл учаскеде арнаны 3 метрге дейін тереңдету қажет. Қазіргі уақытта жұмыстарды орындау үшін үш шынжыр табанды экскаватор тартылған, олардың бірі 18 метрлік ұзын жебемен. Сонымен қатар, технологиялық жолды дайындау үшін стандартты жабдықтары бар техника қолданылады. Бұл жұмыстар 2024 жылғы 14 қазаннан бастап жүргізілуде. Бүгінгі таңда қазылған топырақтың көлемі шамамен 5000 м3 құрайды, ал келісімшарт шеңберінде 23 515 м3 әзірлеу қажет", - деді мердігер компанияның техникалық директоры Алексей Гатин.